المشربيات والمشرفيات

الفرق كبير بين المشربية والمشرفية

المشربيه هى البروزات النصف دائريه المضلعه اللى واضحه فى الصور. المشربية من الشرب لانها مكان يوضع فيه اوانى الشرب الفخار "القُلل" والهدف منها تبريد القلل الفخار بعد ما تتعرض لتيار الهواء من معظم الاتجاهات الخارجيه من غير ما تتأثر بتيار الهواء داخل البيت

وطبعا النتيجه مياه ساقعه فى عز الحر كولدير قناوى او سمنودى يامعلم..

وكان الصانع او المهندس او المقاول يتعمد فى تصميمه يحطها فى مكان يتوفر فيه شرطين الاول انها تكون فى مكان ظل معظم الوقت

والشرط التانى مكان يكون فيه تيار هواء بارد. . نيجى لنقطه كمان ان هاتلاقى فى المشربية فتحه من تحت عشان ضمان ثبات القله الفخار فى مكانها وكمان المياه اللى بترشح من القلة تنزل فى الشارع او على زرع مثلا وطبعا معظم الترميمات بتسدها بحته خشب

المشرفيه هى من الشُرفة اللى بنبص منها للخارج بالبلدى يعنى الشباك وبرضه لازم تبقى فى مجال تيار هواء لكن لازم تدخل منها اشعة الشمس صباحا لكن الظهر وقت الحر بتبقى فى الظل يعنى تسمح بدخول اشعة الشمس ومساحتها كبيرة بتسمح بتجديد تيار الهواء داخل البيت. وكمان اختيار موقع مناسب لتوفير كل ما سبق

اخر نقطه ان الفن اللى احنا بنقول عليه إسلامى كتعريف مفهوم خطأ لدى الجميع. هو اسمه فن شرقى دمشقى مصرى لكن ظهوره فى الفترة الاسلامية اشتهر بالفن الاسلامى بالتالى هو ليس حكرا على المسلمين فقط لانه حسب التاريخ تم استعماله عند غير المسلمين وفى دور عبادة كمان يعنى هاتلاقى كنيسه وهاتلاقى جامع وهاتلاقى معبد يهودى عامل فن الارابيسك والخشب المعشق.